राष्ट्रपतिको स्वास्थ्य स्थिर

काठमाडौँ –  मुटुमा समस्या देखिएपछि अस्पताल भर्ना भएका राष्ट्रपति रामचन्द्र पौडेलको स्वास्थ्य स्थिर रहेको अस्पतालले जनाएको छ ।

मनमोहन कार्डियोथेरासिक भास्कुलर तथा ट्रान्सप्लान्ट सेन्टरमा भर्ना भएका पौडेलको मुटुको चाल मनिटरिङ भइरहेको अस्पतालका कार्यकारी निर्देशक प्रा.डा.रत्नमणि गजुरेलले बताउनुभयो ।

स्वास्थ्यमा समस्या देखिएपछि राष्ट्रपति पौडेललाई गए राति महाराजगन्जस्थित त्रिवि शिक्षण अस्पताल लगिएको थियो ।

गत मंगलबार मुटुमा समस्या देखिएपछि शहीद गंगालाल राष्ट्रिय हृदय केन्द्रमा भर्ना भएका पौडेल गत बुधबार मात्र डिस्चार्ज भएका थिए ।