सरकारमा जान सीके राउत सकारात्मक

काठमाडौँ –  बजेटप्रति असन्तुष्ट जनतम पार्टी सरकारमा सहभागी हुन सकारात्मक देखिएको छ।

सरकारलाई दिएको समर्थनसमेत फिर्ता लिने अन्तिम तयारीमा रहेको जनमत पार्टीका अध्यक्ष चन्द्रकान्त ९सीके० राउतले आइतबार बिहान प्रधानमन्त्री पुष्पकमल दाहाल प्रचण्डसँग भेटवार्ता गर्दै व्यवस्थापन राम्रो भए सरकारमा सहभागी हुन तयार रहेको बताएका हुन्।

जनमतले कृषि वा उद्योग मन्त्रालय पाए उत्कृष्ट काम गर्ने दाबी गरेको छ। आइतबार बालुवाटार पुगेका सीकेलाई प्रधानमन्त्री प्रचण्डले सरकारमा सहभागी हुन आग्रह गर्नुभएको हो ।

बजेटप्रति रुष्ट जनमत पार्टी सरकारलाई दिएको समर्थन फिर्ता लिने तयारीमा छ। यही कुरा जानकारी गराउन प्रधानमन्त्री निवास पुगेका राउतलाई प्रधानमन्त्रीले समर्थन फिर्ता लिएर होइन, सरकारमै सहभागी भएर अघि बढ्न आग्रह गर्नुभएको हो ।

‘पीएम (प्रधानमन्त्री) ले सरकारमै राख्ने कुरा गर्नुभयो,’ भेटवार्तापछि राउतले नेपालखबरसँग भने, कसरी एडजस्ट गर्ने हो, गठबन्धनको बैठक राखेको छु, आजै केही समझदारी बनाउँछु भन्नुभयो ।’

आजै अपराह्न ४ बजे गठबन्धनको बैठक राख्ने तय गरिएको प्रधानमन्त्री प्रचण्डले बताउनुभएको छ । राउतका अनुसार गठबन्धनका केही नेता नमानेकाले जनमतलाई सरकारमा सहभागी गराउने प्रयास सफल भएको छैन ।

‘गठबन्धनका केही नेता मानेका छैनन्, त्यही भएर हो, नत्र प्रधानमन्त्री सकारात्मक हुनुहुन्छ भन्ने पाएँ’, राउतले भन्नुभयो । जनमत सरकारमा सहभागी हुन पाए सरकारलाई दिएको समर्थन यथावत् राख्ने पक्षमा छ।

‘व्यवस्थापन राम्रो भयो भने सरकारमा सहभागी हुन ठीकै छ, काम गर्ने हो,’ राउतले भन्नुभयो ।