रुकुममा एक बालिका भेरी नदीमा बगेर वेपत्ता

रुकुम-  रुकुम पश्चिममा भेरी नदीले बगाउँदा एक बालिका वेपत्ता भएकी छन् । जिल्लाको चौरजहारी नगरपालिका वडा नम्बर १ नरखोलीका झलक वादीकी १० वर्षिया छोरी महिमा वादी भेरी नदीमा बगेर वेपत्ता भएको प्रहरीले जनाएको छ ।

दिदी १८ वर्षिया सरिनासंग भेरी नदीले बगाएर ल्याएको दाउरा निकाल्न गएकी महिमा नदीमा बगेर वेपत्ता भएको जिल्ला प्रहरी कार्यालयले जनाएको छ ।

महिमा दिउँसो २ः५० बजेको समयमा बगेको जिल्ला प्रहरी प्रमुख प्रहरी नायव उपरीक्षक नमराज भट्टराईले बताउनुभयो । वेपत्ता बालिकाको खोजी कार्य भइरहेको उहाँले बताउनुभयो ।

बालिकाका बुवा झलकले जानकारी गराएपछि इलाका प्रहरी कार्यालय चौरजहारीबाट प्रहरी नायव निरीक्षक गगनबहादुर सिंहको कमाण्डमा ५ जनाको टोली घटनास्थलमा खटिएको छ । स्थानीय र प्रहरीको सहयोगमा बालिकाको खोजी कार्या जारी रहेको बताइएको छ ।